കോവിഡിന്റെ പിടിയിൽ നിന്ന് അയഞ്ഞ സംസ്ഥാനത്ത് വർണ്ണപൊലിമകൊണ്ടും ജനപങ്കാളിത്തം  കൊണ്ടും അക്ഷരാർഥത്തിൽ മറ്റൊരു പൂരമായി എറണാകുളം മറൈൻ ഡ്രൈവിലെ  സഹകരണ എക്സ്പോ. കേരളത്തിന്റെ വികസനത്തിൽ സഹകരണ മേഖലയുടെ അനിഷേധ്യ സാന്നിധ്യം അനാവരണം ചെയ്തതോടൊപ്പം  സഹകരണത്തിന്റെ ഒരുമയും കരുത്തും ഇനിയും പൂർണമായും ഉപയോഗപ്പെടുത്തേണ്ട സാധ്യതയും തുറന്നു കാണിക്കുന്നതാണ് പ്രദർശനം. കാർഷികാവശ്യങ്ങൾക്ക്‌ സാമ്പത്തിക സഹായം നൽകാൻ പണ്ട് കാലത്ത് ഉദയം ചെയ്ത സഹകരണ പ്രസ്ഥാനത്തിന്റെ ഇന്നത്തെ വളർച്ച ഓരോ നാടിന്റെയും വികസനമാണ്. കോർപ്പറേറ്റ് സ്ഥാപനങ്ങളുടെ നീരാളി പിടുത്തത്തിൽ നിന്ന് സാധാരണക്കാരെയും സാമ്പത്തിക മേഖലയെയും രക്ഷിക്കാൻ കോ-ഓപ്പറേറ്റ്  പ്രസ്ഥാനത്തിന്  ശേഷിയുണ്ടെന്ന് പ്രഘോഷണം ചെയ്യുകയാണ് ഇവിടെ. ഒരു കാലത്ത് കോർപ്പറേറ്റ് സ്ഥാപനങ്ങളുടെ കുത്തകയായിരുന്ന പല മേഖലകളിലേക്കും ഇന്ന് സഹകരണ പ്രസ്ഥാങ്ങൾ ചുവടുവെച്ചു കഴിഞ്ഞു, വന ഉത്പന്നങ്ങൾ വിപണനം ചെയ്യുന്ന സംഘങ്ങൾ മുതൽ കെട്ടിട നിർമാണരംഗത്ത് ശക്തമായ അടിത്തറയുള്ള സംഘങ്ങളും  അത്യാധുനിക സാങ്കേതികവിദ്യ ഉത്‌പന്നമാക്കിയ സംഘങ്ങളുമെല്ലാം നമ്മുടെ സാമൂഹിക വ്യവസ്ഥിതിയിൽ കൊടുംകാറ്റ് തന്നെയാണ് അഴിച്ചു വിട്ടിരിക്കുന്നതെന്ന കാര്യത്തിൽ സംശയമില്ല. ഇതിന് ശക്തി പകരേണ്ടത് നാം ഓരോരുത്തരുമാണ്.