വൈവിധ്യമാർന്ന ചെടികളുടെ വിപണിയുമായി സഹകരണ എക്സ്പോയിൽ ഒരു മിനി നഴ്സറി തന്നെ ഒരുക്കിയിരിക്കുകയാണ് വടകര റൂറൽ ബാങ്ക്. ബാങ്കിന്റെ കീഴിലുള്ള വടകര സഹകരണ കാർഷിക നഴ്സറിയുടെ 181 - ാം നമ്പർ സ്റ്റാൾ ഇതിനോടകം തന്നെ സന്ദർശകരുടെ ശ്രദ്ധാകേന്ദ്രമായി മാറിക്കഴിഞ്ഞു. അലങ്കാര ചെടികൾക്കും വിവിധയിനം പൂച്ചെടികൾക്കുമായി നിരവധി പേരാണ് സ്റ്റാളിൽ ഒഴുകിയെത്തുന്നത്. ബാംഗ്ലൂരിൽ നിന്നും എത്തിക്കുന്ന അഗ്ലോണിയ, സീ സീ , ബർക്കിൻ, ലില്ലി തുടങ്ങിയ അലങ്കാര ചെടികൾ റോസ്, ചെത്തി, കനകാമ്പരം, ജമന്തി, തെച്ചി തുടങ്ങിയ പൂച്ചെടികൾക്കും ആവശ്യക്കാർ എത്തുന്നുണ്ട്. തേൻവരിക്ക, മാവ്, പ്ലാവ്, കുറ്റ്യാടി, റംബൂട്ടാൻ തുടങ്ങിയ പഴവർഗ്ഗ തൈകൾ, തെങ്ങ്, കവുങ്ങ് തൈകൾ  എന്നിവയുടെയും വിപണി കൊഴുക്കുകയാണ്. ഇവ കൂടാതെ പച്ചക്കറി വിത്തുകൾ, ജൈവവളം, ചെടി ചട്ടികൾ എന്നിവയും സ്റ്റാളിൽ ലഭിക്കും. എല്ലാം കുറഞ്ഞ നിരക്കിൽ ലഭ്യമാക്കാനിക്കുന്നു എന്നതാണ് ഇവിടുത്തെ പ്രത്യേകത.