ശതാബ്ദിയുടെ നിറവിൽ എത്തിയ എറണാകുളം ജില്ലയിലെ കാക്കൂർ സർവ്വീസ് സഹകരണ ബാങ്കിന്റെ പ്രവർത്തനങ്ങളെ കുറിച്ച് ടീം കോ-ഓപ്പറേറ്റീവ് തയ്യാറാക്കിയ  ഡോക്യുമെൻററി 96 - മത് വാർഷിക പൊതുയോഗത്തിൽ പ്രദർശിപ്പിച്ചു. ബാങ്കിന്റെ ഇതുവരെയുള്ള 100 വർഷത്തെ ചരിത്രം ദൃശ്യവത്കരിച്ച ഡോക്യുമെന്ററി മികച്ച അഭിപ്രായം നേടി. അതേ വേദിയിൽ  ടീം കോ- ഓപ്പറേറ്റീവ് ദൃശ്യാവിഷ്കാരം നടത്തിയ കാക്കൂർ  സഹകരണ ബാങ്കിൻറെ നൂറു വർഷത്തെ ചരിത്രം വർണ്ണിക്കുന്ന ശതാബ്ദി  ഗീതവും പുറത്തിറക്കി. സാജു മണ്ണത്തൂർ രചിച്ച ഗാനത്തിന് സനു ഗോപിനാഥാണ് സംഗീതവും ആലാപനവും നിർവ്വഹിച്ചിരിക്കുന്നത്.

കാക്കൂർ മിനി ഓഡിറ്റോറിയത്തിൽ നടന്ന യോഗത്തിൻറെ ഉദ്ഘാടനം തിരുമാറാടി ഗ്രാമപഞ്ചായത്ത് പ്രസിഡണ്ട് രമ മുരളീധര കൈമൾ നിർവഹിച്ചു. ബാങ്ക് പ്രസിഡന്റ് അനിൽ ചെറിയാൻ അധ്യക്ഷനായി. യോഗത്തിൽ സന്നദ്ധസേനാ പ്രവർത്തകർ, ആശാ വർക്കർമാർ , കുടുംബശ്രീ പ്രവർത്തകർ, കർഷകർ, ബാലസംഘത്തിലെ കുട്ടി കർഷകർ ,സി.ഡി.എസ് ചെയർപേഴ്സൺമാർ തുടങ്ങിയവരെ ആദരിച്ചു. മുറ്റത്തെ മുല്ല ഗ്രൂപ്പുകൾക്കുള്ള 2021 ലെ ഇൻസന്റീവ്  വിതരണം ചെയ്തു. മുൻ എം.എൽ. എ യും ബാങ്കിന്റെ  മുൻ പ്രസിഡന്റുമായ എം .ജെ .ജേക്കബ്  , പഞ്ചായത്ത് വൈസ് പ്രസിഡന്റ് എം.എം ജോർജ് , പഞ്ചായത്ത് അംഗങ്ങൾ, ബാങ്ക് വൈസ് പ്രസിഡന്റ് അഡ്വ.സിനു എം ജോർജ് , സെക്രട്ടറി ടി.എസ്. ശ്രീദേവി അന്തർജനം, മുൻ ബാങ്ക് പ്രസിഡന്റുമാർ, ജീവനക്കാർ  തുടങ്ങിയവർ പങ്കെടുത്തു.