വാട്സ് ആപ്പ്, വാട്സ് ആപ്പ് ബിസിനസ്സ് എന്നിവയുടെ സേവന നയങ്ങൾ രാജ്യത്തെ ഐ. ടി. നിയമത്തിന്റെ ലംഘനമാണെന്നാരോപിച് അഭിഭാഷകനും വിദ്യാഭ്യാസ വിദഗ്ദനുമായ ഹർഷ ഗുപ്ത നൽകിയ ഹർജിയിലാണ് വാട്സാപ്പിന്റെ എതിർ സത്യവാങ്മൂലം. സ്വകാര്യത, വിവര ശേഖരണം എന്നീ വിഷയങ്ങളിൽ മറ്റു പല കമ്പനികളും തങ്ങളുടേതിന് സമാനമായ നയമാണ് പിന്തുടരുന്നതെന്നും തങ്ങളേക്കാൾ വിവരങ്ങൾ കൈവശം വെക്കുന്ന കമ്പനികളുണ്ടെന്നും വാട്സാപ്പ് ഡൽഹി ഹൈ കോടതിയെ അറിയിച്ചു. കേന്ദ്ര സർക്കാരിന്റെ ആരോഗ്യ സേതു ആപ്ലിക്കേഷനും, സൊമാറ്റോ, ഓല, ബിഗ് ബിസ്കറ്റ്, ട്രൂ കോളർ, മൈക്രോ സോഫ്റ്റ്‌, ഗൂഗിൾ, സൂം, തുടങ്ങിയ കമ്പനികളും വ്യക്തി വിവരങ്ങൾ ശേഖരിക്കുന്നുണ്ട്. റിപ്പബ്ലിക് ടീവിയുടെ മൊബൈൽ ആപ്പും ഡേറ്റ ശേഖരിക്കുന്നു. സ്വകാര്യത സംബന്ധിച്ച് തങ്ങളുടെ നയങ്ങൾ നടപ്പാക്കുന്നത് കോടതി തടയുകയാണെങ്കിൽ ഒരു സ്വകാര്യ കമ്പനിയുടെ സേവനം ഉപയോഗിക്കാനുള്ള വ്യക്തികളുടെ സ്വാതന്ത്ര്യമാണ് ഇല്ലാതാകുന്നത് എന്നും വാട്സ്ആപ് സത്യവാങ്മൂലത്തിൽ പറയുന്നു.