2002 ലെ മള്‍ട്ടിസ്റ്റേറ്റ് സഹകരണ സംഘം നിയമപ്രകാരം രജിസ്റ്റര്‍ ചെയ്ത് സംസ്ഥാനത്ത് പ്രവര്‍ത്തിച്ചു വരുന്ന സഹകരണ സംഘങ്ങള്‍ക്ക് ഈ നിയമത്തിലെ വകുപ്പ് 84 പ്രകാരവും 1996 ലെ ആര്‍ബിട്രേഷന്‍ ആന്റ് കണ്‍സിലിയേഷന്‍ ആക്ട് അനുസരിച്ചും ഈ സംഘങ്ങളുടെ മാനേജ്‌മെന്റ്, കോണ്‍സ്റ്റിറ്റിയൂഷന്‍ എന്നിവയുമായി ബന്ധപ്പെട്ടതും (ഒരു മള്‍ട്ടി സ്റ്റേറ്റ് കോപ്പറേറ്റീവ് സൊസൈറ്റി അതിന്റെ വേതനം പറ്റുന്ന ജീവനക്കാര്‍ക്കെതിരെ എടുക്കുന്ന അച്ചടക്ക നടപടിയോ അല്ലെങ്കില്‍ 1947ലെ ഇന്‍ഡസ്ട്രിയല്‍ ഡിസ്പ്യൂട്ട് ആക്ടിലെ വകുപ്പ് 2 ( കെ ) പ്രകാരം പ്രഖ്യാപിച്ചിട്ടുള്ള ഇന്‍ഡസ്ട്രിയല്‍ ഡിസ്പ്യൂട്ടോ ഒഴികെയുള്ളവ ) തര്‍ക്കങ്ങള്‍ പരിഹരിക്കുന്നതിന്, 2002ലെ മള്‍ട്ടി സ്റ്റേറ്റ് സഹകരണ സംഘം നിയമത്തിലെ വകുപ്പ് 4 (2)ന്റെ അടിസ്ഥാനത്തില്‍ ആര്‍ബിട്രേറ്റര്‍മാര്‍ക്കായി  അപേക്ഷ ക്ഷണിച്ചു. അപേക്ഷകന്‍  സംസ്ഥാന സഹകരണ വകുപ്പില്‍ നിന്നും ഡെപ്യൂട്ടി രജിസ്ട്രാര്‍ / ഡെപ്യൂട്ടി ഡയറക്ടര്‍ തസ്തികയില്‍ കുറയാത്ത തസ്തികയില്‍ വിരമിച്ചവരും, 2025 ഓഗസ്റ്റ് 7ന് വിരമിച്ച ശേഷം 20 മാസം കഴിയാന്‍ പാടുള്ളതും അല്ല. താല്‍പര്യമുള്ളവര്‍ വെള്ള പേപ്പറില്‍ തയ്യാറാക്കിയ അപേക്ഷയോടൊപ്പം വിരമിച്ച തീയതി, തസ്തിക, വകുപ്പ് എന്നിവ വ്യക്തമാക്കുന്ന രേഖകളുടെ സ്വയം സാക്ഷ്യപ്പെടുത്തിയ പകര്‍പ്പ് സഹിതം ഓഗസ്റ്റ് 4 ന് വൈകിട്ട് 5 മണിക്ക് മുന്‍പ്  സഹകരണ സംഘം രജിസ്ട്രാര്‍ ഓഫീസിലെ ഡെപ്യൂട്ടി രജിസ്ട്രാര്‍ ( ഭരണം) മുമ്പാകെ അപേക്ഷ സമര്‍പ്പിക്കണമെന്ന് സഹകരണ സംഘം രജിസ്ട്രാര്‍ അറിയിച്ചു.   രൂപീകരിക്കുന്ന ആര്‍ബിട്രേറ്റര്‍മാരുടെ പാനലില്‍ നിന്നും സംസ്ഥാനത്ത് പ്രവര്‍ത്തിക്കുന്ന മള്‍ട്ടി സ്റ്റേറ്റ് സഹകരണ സംഘങ്ങള്‍ ഫയല്‍ ചെയ്യുന്ന ആര്‍ബിട്രേഷന്‍ കേസുകള്‍ തീര്‍പ്പാക്കുന്നതിനായി, സഹകരണ സംഘം രജിസ്ട്രാര്‍ പ്രത്യേക ഉത്തരവ് മുഖേന ചുമതലപ്പെടുത്തുന്ന ആര്‍ബിട്രേറ്റര്‍മാര്‍ ഈ നിയമത്തിലെ വ്യവസ്ഥകള്‍ പാലിച്ച് ആര്‍ബിട്രേഷന്‍ കേസുകള്‍ തീര്‍പ്പാക്കി അവാര്‍ഡ് പുറപ്പെടുവിക്കേണ്ടതാണ്. നിയമിക്കപ്പെടുന്ന ആര്‍ബിട്രേറ്റര്‍മാരുടെ പ്രതിഫലം ഈ നിയമത്തിലെ വ്യവസ്ഥകള്‍ക്ക് അനുസൃതമായി ബന്ധപ്പെട്ട സംഘത്തില്‍ നിന്നും ലഭിക്കുന്നതാണ്